Uppsveitastjarnan – fyrstu forkeppni frestað um viku

lindaFréttir

Af óviðráðanlegum ástæðum verður fyrstu forkeppni Uppsveitastjörnunnar, hæfileikakeppni Upplits, frestað um viku. Skráningarfrestur hefur þess vegna verið framlengdur um viku, eða til og með þriðjudeginum 23. október. Keppnin fer fram í félagsheimilinu Borg í Grímsnesi laugardaginn 27. október kl. 15-17. Nú er því ekki eftir neinu að bíða fyrir hæfileikaríkt uppsveitafólk á öllum aldri með að skrá sig í keppnina, æfa atriði og slá í gegn!

Allir í uppsveitunum geta tekið þátt – og er lögheimili á svæðinu ekki krafa. Geti keppandi sýnt fram á sannfærandi tengsl við uppsveitirnar er sjálfsagt mál að hann fái að skrá sig til keppni. Upplit hvetur unga jafnt sem aldna, einstaklinga og hópa, t.d. vinnufélaga, skólafélaga, vinahópa og fjölskyldur, til að taka þátt og keppa um titilinn Uppsveitastjörnuna.

Dómnefnd skipuð valinkunnum einstaklingum úr uppsveitunum ásamt gestadómurum velur þrjú bestu atriðin í hverri forkeppni, sem síðan keppa til úrslita í Aratungu 1. mars. Frumleiki, skemmtun og sköpunargleði vega þungt þegar atriði eru valin í úrslit.

Hámarkslengd atriða er fimm mínútur – en þau mega líka gjarnan vera styttri. Annars fá keppendur frjálsar hendur og um að gera að láta hugmyndaflugið ráða för. Veitt eru verðlaun og allir þátttakendur fá auk þess viðurkenningu.

Skráning stendur eins og áður sagði til 23. október. Tekið er við skráningum á upplit@upplit.is og í síma 898 1957.

Hægt verður að fylgjast með fréttum af keppninni hér á vefnum og á Facebook-síðu Upplits.

Menningarráð Suðurlands styður Uppsveitastjörnuna – og einnig sveitarfélögin í uppsveitunum, sem leggja til félagsheimilin fyrir keppnirnar.