Framkvæmdir við nýtt íbúðahverfi og miðsvæði hafnar

Nú um áramótin hófust framkvæmdir við gatnagerð á nýju miðsvæði og íbúðahverfi á Borg í Grímsnesi. Í fyrsta áfanga miðsvæðis verður lóð fyrir eldsneytis- og hraðhleðslustöð ásamt möguleika á verslunar- og veitingarekstri. Einnig verður hótellóð fyrir allt að 70 herbergja hótel og fjórar lóðir fyrir blandaða atvinnustarfsemi með möguleika á íbúðum á efri hæð.

Aðalgatan mun bera nafnið Miðtún og verða einnig kláraðar tvær íbúðarhúsagötur, Borgartún og Lækjartún. Í Borgartúni verður gert ráð fyrir fjölbýlishúsum en í Lækjartúni verður blanda af einbýlum, parhúsum og raðhúsum. Heildarfjöldi íbúða verður að hámarki 40. Gert er ráð fyrir innviðum fyrir þriðju götuna, Skógartún í verkinu ásamt innviðum fyrir áframhaldandi framkvæmdir norðan við þetta svæði. Einnig verður gangsett ný og fullkomin skólphreinsistöð fyrir hverfið og verður Grímsnes- og Grafningshreppur enn leiðandi í hreinsun skólps á landsvísu með þeirri viðbót. Gert er ráð fyrir blágrænum ofanvatnslausnum að hluta í hverfinu.

Mikill áhugi hefur verið meðal fyrirtækja fyrir miðsvæðinu og verður ferli við úthlutun lóða kynnt innan tíðar. Töluverð tækifæri eru í uppbyggingu þjónustu á svæðinu, fyrir íbúa, sumarhúsaeigendur og ferðamenn. Markmið framkvæmdanna er að auka þjónustu í nærsamfélaginu, vera leiðandi í orkuskiptum með öflugri hraðhleðslu fyrir bæði fólksbíla og atvinnutæki ásamt því að hafa ávallt í boði hagkvæmar byggingarlóðir.

Aðalverktakar eru JJ pípulagnir ehf. og Jarðtækni ehf og eru áætluð verklok 1. september 2024.

Verkið samræmist heimsmarkmiðum nr. 6, 7, 8, 9, 11 og 12.