Gamla Borg opin gestum á þjóðhátíðardaginn

Í tilefni þjóðhátíðardagsins verður Gamla Borg opin gestum og gangandi miðvikudaginn 17. júní frá kl. 12:00 til 16:00. Kl. 12:15 flytur oddviti sveitarstjórnar stutta ræðu og að henni lokinni gefst gestum tækifæri til að ganga um húsið og kynna sér þetta sögufræga kennileiti á Borg.

Gamla Borg var reist árið 1929 af Ungmennafélaginu Hvöt eftir teikningum Þorleifs Eyjólfssonar. Húsið var upphaflega byggt sem samkomuhús sveitarinnar og skóli. Húsið varð síðar mikilvægur vettvangur samkomuhalds í Grímsnesi. Þar voru meðal annars haldnir fundir, skemmtanir og vinsæl Minni-Borgarböll.

Eftir að nýtt félagsheimili tók við hlutverki hússins árið 1966 fékk Gamla Borg ýmis önnur hlutverk og var um tíma nýtt sem bílaverkstæði. Þegar húsið var orðið illa farið á tíunda áratugnum var ráðist í viðamikla endurgerð og það endurvígt árið 1999.

Grímsnes- og Grafningshreppur keypti Gömlu Borg fyrr á þessu ári með það að markmiði að tryggja varðveislu hússins og nýta það áfram í þágu samfélagsins. Opna húsið er því kærkomið tækifæri til að líta inn, kynna sér sögu hússins og njóta þjóðhátíðardagsins saman á Borg.