Grímsnes- og Grafningshreppur tekur þátt í þróun gervigreindarlausnar fyrir sveitarfélög í samstarfi við APRÓ.

Áhersla á öryggi, stefnumótun og framsækna þjónustu.

Grímsnes- og Grafningshreppur tekur nú þátt í sameiginlegu þróunarverkefni í samstarfi við upplýsingatæknifyrirtækið APRÓ. Verkefnið felur í sér innleiðingu sérsniðinnar gervigreindarlausnar sem ætlað er að styðja við daglega starfsemi, efla skilvirkni og bæta þjónustu við íbúa.

Samhliða verkefninu vinnur sveitarfélagið jafnframt að mótun stefnu um notkun gervigreindar og upplýsingaöryggi fyrir sveitarfélagið Grímsnes- og Grafningshrepp.
Lykilþáttur í verkefninu er að lausnin er hýst í öruggu umhverfi þar sem sveitarfélagið heldur fullu eignarhaldi á gögnum sínum. Starfsfólk fær einnig fræðslu og leiðbeiningar um ábyrga og markvissa notkun gervigreindar.

„Ég fagna mjög þessu samstarfi og tel mikilvægt að sveitarfélögin setji sér stefnu um notkun gervigreindarinnar um leið og þau skapi starfsfólki góð skilyrði til að vinna með gervigreindina í öruggu umhverfi – því hún er komin til að vera,“ segir Fjóla Steindóra Kristinsdóttir sveitarstjóri Grímsnes- og Grafningshrepps.

„Við hjá APRÓ erum virkilega spennt fyrir þessu samstarfi og höfum trú á því að APRÓ Liðsaukinn geti skapað mikið virði á stuttum tíma. Við erum ekki síður stolt af nálguninni en þar eiga sveitarfélögin sem koma inn í lausnina afurðirnar sjálf. Auk þess er fyllsta öryggis gætt í bæði þróun og innleiðingu Liðsaukans. Okkar hlutverk er einfaldlega að hjálpa notendum að ná markmiðum sínum á skilvirkan og öruggan hátt.” segir Páll Jónsson framkvæmdastjóri Viðskiptaþróunar hjá APRÓ.

Á þróunartímabilinu verða kortlagðir helstu verkferlar þar sem gervigreind getur stutt við starfsemi sveitarfélagsins, byggt upp innra þekkingarsafn og haldin fræðslunámskeið fyrir starfsfólk. Að lokum verður gerð samantekt með mælingum og tillögum um framhaldið.

Með þessum skrefum markar Grímsnes- og Grafningshreppur upphaf að nýrri tækniþróun í þjónustu við íbúa – með áherslu á öryggi, ábyrgð og nýsköpun.