Sjúkraþjálfun Borg tekur til starfa í íþróttamiðstöðinni

Þann 7. mars síðastliðinn var undirritaður samningur við sjúkraþjálfarana Þórfríði Soffíu Haraldsdóttur og Ölmu Önnu Oddsdóttur um starfsemi sjúkraþjálfunar í nýrri líkamsræktaraðstöðu á Borg.

Við hönnun og uppbyggingu nýju líkamsræktaraðstöðunnar var sérstaklega horft til þess að skapa rými fyrir heilsutengda þjónustu í sveitarfélaginu. Þær Þórfríður og Alma Anna sýndu því áhuga að koma á Borg og hefja þar rekstur sjúkraþjálfunar sem mun nýtast bæði íbúum sveitarfélagsins og nærliggjandi svæða.

Þórfríður Soffía hefur um nokkurt skeið starfað í sveitarfélaginu með Slitgigtarskólann og hefur þjónusta hennar reynst íbúum afar vel. Hópatímar hennar hafa notið mikilla vinsælda og skapað mikilvægt tækifæri fyrir íbúa til að efla heilsu og hreyfingu í nærumhverfi sínu.

Alma Anna kemur með víðtæka reynslu af störfum hjá sjúkraþjálfunarstöðinni Mætti á Selfossi en hún starfaði einnig um tíma sem hreyfingarstjóri hjá Heilbrigðisstofnun Suðurlands.

Í sameiginlegri yfirlýsingu frá þeim Þórfríði og Ölmu segir:

„Við erum mjög ánægðar með þessa litlu stofu okkar á þessum fallega stað sem Borg í Grímsnesi er. Við bjóðum upp á alla almenna sjúkraþjálfun ásamt sérhæfðari sjúkraþjálfun eins og vegna vefjagigtar, flóknari stoðkerfisvanda, einstaklinga með slitgigt í hnjám og mjöðmum og fólk með ME.“

Samningurinn er mikilvægt skref í að efla aðgengi að heilbrigðisþjónustu í heimabyggð og styður við þá framtíðarsýn sveitarfélagsins að byggja upp fjölbreytta heilsutengda þjónustu á Borg

Fyrir tímapantanir og nánari upplýsingar er hægt að senda tölvupóst á sjukrathjalfunborg@gmail.com