Tunglskot eða öllu heldur jarðskot

Samstarf um næsta áfanga djúpborunarverkefnis IDDP-3 undirritað

Þann 8. maí síðastliðinn undirrituðu fulltrúar Orkuveitunnar, HS Orku, Landsvirkjunar og stjórnvalda samstarfssamning vegna næsta áfanga íslenska djúpborunarverkefnisins (IDDP-3). Verkefnið er liður í svokallaðri djúpnýtingarvegferð Orkuveitunnar sem miðar að því að þróa nýjar leiðir til að nýta ofurheitan jarðhita úr dýpri og heitari jarðlögum en nýtt eru í dag.

Samningurinn var undirritaður af Heru Grímsdóttur, framkvæmdastýru rannsókna og nýsköpunar hjá Orkuveitunni, Lilju Magnúsdóttur, framkvæmdastjóra auðlinda hjá HS Orku, Bjarna Pálssyni, framkvæmdastjóra vinds og jarðvarma hjá Landsvirkjun, og Jóhanni Páli Jóhannssyni, umhverfis-, orku- og loftslagsráðherra, fyrir hönd stjórnvalda.

Undirritunin markar mikilvægt skref í áframhaldandi þróun verkefnisins en unnið hefur verið að rannsóknum á nýtingu ofurheits jarðhita í nær tvo áratugi. Nú þegar hefur verið sýnt fram á að orkan er til staðar, en næsta skref felst í að leysa þær tæknilegu áskoranir sem fylgja nýtingunni. Takist að þróa tæknina með góðum árangri gæti það haft veruleg áhrif á nýtingu endurnýjanlegrar orku til frekari verðmætasköpunar.

Áætlað er að bora rannsóknar- og djúpborunarholuna IDDP-3 á Nesjavöllum í Grímsnes- og Grafningshreppi í lok árs 2026 sem hluta af næsta áfanga íslenska djúpborunarverkefnisins. Markmið holunnar er fyrst og fremst að rannsaka möguleika á nýtingu svokallaðs ofurheits jarðhita við meira en 400°C hita og á allt að 4–5 km dýpi. Árið 2027 er síðan ráðgert að bora sérstaka niðurdælingarholu til að rannsaka niðurdælingu vatns í ofurheit jarðlög og styðja þannig við áframhaldandi þróun djúpnýtingar jarðhita.

Verkefnið hefur vakið verðskuldaða athygli bæði erlendis og innan fræðasamfélagsins enda er markmið þess að færa jarðhitanýtingu á nýtt tæknistig. Takist vel til gæti Ísland enn á ný fest sig í sessi sem leiðandi þjóð á sviði nýtingar jarðvarma og þróunar sjálfbærra orkulausna.

Verkefnið er jafnframt talið geta haft jákvæð áhrif á nærsvæðið, bæði með auknum áhuga ferðamanna og vegna þess fjölda sérfræðinga og verktaka sem mun starfa á svæðinu meðan rannsóknir og framkvæmdir standa yfir.

Frá vinstri: Hera Grímsdóttir framkvæmdastýra Rannsókna og nýsköpunar hjá Orkuveitunni, Fjóla St. Kristinsdóttir sveitarstjóri Grímsnes- og Grafningshrepps, Lilja Magnúsdóttir framkvæmdastjóri auðlinda hjá HS Orku, Sævar Freyr Þráinsson forstjóri Orkuveitunnar, Jóhann Páll Jóhannsson umhverfis-, orku- og loftslagsráðherra, Árni Hrannar Haraldsson framkvæmdastjóri Orku náttúrunnar, Sigurður H. Markússon leiðtogi djúpnýtingar hjá Orkuveitunni og Bjarni Pálsson, framkvæmdastjóri Vinds og jarðvarma hjá Landsvirkjun.